🙏 ब्वे - श्री मनोज घिल्डि़याल

 📝प्राथमिक शिक्षकों की अपनी साहित्यशाला, हिम मन मन्थन में "अन्तरराष्ट्रीय महिला दिवस" के परिप्रेक्ष्य में प्रस्तुत है जनपद पौड़ी गढ़वाल से शिक्षक साथी श्री मनोज घिल्डि़याल जी द्वारा रचित गढ़वाली कविता-:

*🙏🏾✍️ब्वे*

अफु त तचणी रैंद व,

अपड़ि गैती घाम नि चितांद। 

अर हैंकखुणै, 

डाली छैल बण जांद व।। 

अफु त भिजणी रैंद व,

अपड़ि गैती गिल्लि नि चितांद। 

अर हैंकखुणै,

छतुल बण जांद व।। 

अफु त भुक्कि रैंद व,

अपड़ि भूख नि चितांद। 

अर हैंक खुणै,

रुट्टी गप्फा बण जांद व।। 

अफु तिसलि रैंद व,

अपड़ि तीस नि चितांद। 

अर हैंकखुणै,

पाणी घुटाक बण जांद व।। 

अफु बिज्जि रैंद व,

अपड़ि निंद नि चितांद। 

अर हैंक खुणै,

घुघूती बसूती बण जांद व।। 

अफु सैणी किटेणी पत्वलेणी रैंद व,

अपड़ि खैरि विपदा नि चितांद। 

अर हैंकखुणै,

धरति बण जांद व।।

🙏रचना-:

मनोज घिल्ड़ियाल 

रा० प्रा० वि० गाडियूंँ 

प्रखण्ड- रिखणीखाल 

जिला- पौड़ी गढ़वाल

🙏संकलन- टीम हिम मन मन्थन उत्तराखण्ड